Pacang Pakhat Cu Bungbel A Tum Tiah Ni 7 Sung Thawng An Thlak

Mon ramkulh Tațhung khawpi Binhlaing veng ah February 4 zaan suimilam 8:00 hrawngah bungbel a tum tiih kaihmi pacang pakhat cu Tațhung peng thuțhennak zung in ni 7 sung thawng a thlak thu theih a si.

“Police act 47, rii buai timi thawn tuizing (February 5) ah thuțhennak zung an fehpi ih thawng an thlak, a dik tak cun tangka 5000 cawh dingmi rori cu ni 7 sung thawng an thlak” tiah Tațhung peng a țumhnihnak ramkulh hluttaw palai U Aung Kyaw Thu in simnak a nei.

Kum 60 ih upa pacang cu nauhak hrekkhat ih bungbel tum zoh in leng a suak caan ah veng sung ih vak palik le ralkap pawl cun bungbel a tum timi phuahhlam thawn an kaih tiah theih a si.

Hi thuhla thawn pehparin kaih tong pacang cu Tațhung khawpi palik zung cun (ပ) 34/2021, police act 47 hmangin thubuai a tuahsak tiah theih a si.

Mandalay khawpi Chanmyatharsii peng khalah February 4 ih bungbel tumtu minung 20 lenglo cu kaih an siih February 5 zing ah peng thuțhennak zung ah an fehpi thu theih a si.

Myanmar ram hmun tinkim ah ralkap uknak duh lo langter in zaan suimilam 8:00 a kim cunn bungbel tum ih cangvaihnak cu February 2 zaan ihsin an rak thok.

Be the first to comment

Leave a Reply

Your email address will not be published.


*