Chin ramkulh ih NLD Hluttaw palai pawl nih Chin ramsung ah PDF dinh an tum

Tunai cu Chin ramkulh NLD hluttaw palai ṭhenkhat nih Chin ramsung ah hin PDF dinh ve siseh tiah a thupthli te in khua khang nak an rak nei. PDF cu NLD+CRPH+NUG nih an dinh mi a si ruangah PDF nih cun Democracy lawng hi an tumtahmi a si. Tlangpar miphun hrang ah Federal timi an tumtah ve lo. Myanmar rampi hi Democracy ngah ding lawng an tumtahmi a si.

Asina te in kan nih Tlangcung miphun cu Myanmar rampi Democracy ngah lawngin a za bak lo. Federal Democracy hi kan ṭul poimawh tukmi a si. NLD+CRPH+NUG nih Federal Democracy an duhlo ruangah Federal Army zawng an dinh duhlo ih People’s Defense Force tiin an dinh. Curuangah KNU le KIA le AA le Shan State Army (SSA) te pawl nih tla NUG hi 100 ah 100% an zumh ngam lonak bak a si.

Cutin NLD+CRPH+NUG nih Myanmar ramsung ah hin NLD lal ringring dingmi an duh ruangah Chin ramkulh sung khalah PDF dinh dingin khua an khang, NLD hotu lam nih Chin ram ih NLD hluttaw palai pawl cu an tokphirh ih Chin ramkulh Hluttaw palai le NLD milai pawl nih CDF le CNO/CNDF pawl cu PDF ah lut dingin khua an rak khang. Cumi cu CNF lei nih an theih tikah an duhlo zet, ih Chinland Defense Force (CDF) nih tla statement an rak suah zo.

Chin State ah PDF kan ṭul lo

Atu CNO/CNDF hi an hotu lam cu NLD mi hlir an si ruangah CNO/CNDF hi PDF ah an let ṭheh men thei tiah zumh nak a um. Tedim peng ah PDF an dinh zo ih, Falam pengih CNO/CNDF thawn peh tlai in NLD mi le sa pawl nih PDF ah an kom ter ṭheh tum tiah thuthang theih a si. Curuangah CNO/CNDF hi PDF (NLD Army) an si kho men a si. Chin ram ah CNA, ZRA, CNDF, CDF tiin an um hi a tawk tuk ko mi a si. Chin ram ah PDF a ṭul hrimhrim lo mi a si. Chin ramsung ih PDF dinh duh tu le dinh dingih khua khuang tu pawl hi NLD hluttaw pawl lawngte an si.

Curuangah tu ṭum Myanmar ramsung kahdonak ah NLD nih hin 2020 hril tling mi Party kan si, kan kut chung ah nawl neihnak a thleng sal a ṭul bak ti lawngte hi an lungput ah a um rih a si ahcun Myanmar ramsung ah hin daihnak a um thei hrim lo ding. 2008 Constitution kan ṭhiatbal cang tiin anmah rori nih official in an tuah zo ruang ah 2020 election ih nehnak cotu kan si, nawl neihnak kan hnen ah thleng sal seh, timi hrim an lungput zawng hi an thlengh a ṭul tuk.

 

Be the first to comment

Leave a Reply

Your email address will not be published.


*