CDM Ah Nunnak Thaptu Ih Ruak Cu Ropi Zetin Thlah Liam Ding

Naypyitaw palik bawi pakhat ih kahngahmi Ma Mya Thawte Thawte Khaing cu tuini February 12 ah Naypyitaw innkhun 1000 siizung ah a nunnak a cem thu siibawi in simnak a nei.

Naypyitaw ihkhun 1000 siizung ih siibawi pakhat in “a thluak a thi zo tiah kan ruat, oxygen phelh dingin a innsang pawl kan theiter zo, a diktak cun mina hi a thi zo, sii lam thiamnak in thluak thi timi cu thi a si ko, a innsang pawl cun ziangtik caan ah oxygen an phelh ding timi an sim hrih lo” tiah simnak a nei.

Ma Mya Thawte Thawte Khiang ih lu ah a lutmi cerek cu phorh dingin timtuahnak neih a si na’n, tuizing February 12 ah siibawi pawl cun an tha an thlahsal.

February 9 Naypyitaw ih ralkap uknak duh lo langter duhphorhnak ah palik pawlin mipi pungkhawm lo dingih an tuahnak ah Ma Mya Thawte Thawte Khaing ih lu ah cerek in a ngah.

Ma Mya Thawte Thawte Khaing ngahnak cerek cu zinzoinak vek asile palik pawl ih cerek cu buainak ih hmanmi Raber cerek siloin thir ih tuahmi cerek a si tiah siibawi pakhat in a sim.

Rampi thuneihnak latu ralkap lam pawl cun hi buainak ahhin cerek ngaingai thawn kah a si lo thu an sim. Ma Mya Thawte Thawte Khaing cu ralkap thuneihnak lakmi duh lo duhphorhnak ah hmaisabik nunnak thaptu a si.

Ma Mya Thawte Thawte Khaing ih ruak thlahnak cu Naypyitaw ah a ropi thei bikin tuah dingah tawlrel a si thu NLD palai pakhat in simnak a nei.

Be the first to comment

Leave a Reply

Your email address will not be published.


*